Efallai y bydd miliynau o bobl ledled y DU, gan gynnwys llawer yn Llanelli, yn cael eu heithrio o’u hawl ddemocrataidd i bleidleisio o dan gynlluniau a gyflwynwyd heddiw gan Lywodraeth Geidwadol y DU, yn ôl yr Aelod Seneddol lleol, Nia Griffith.
Yn Araith ddiweddar y Frenhines, cyhoeddodd y Llywodraeth yn ffurfiol eu cynlluniau i gyflwyno ID Pleidleisiwr gorfodol yn yr etholiad nesaf. Mae’r polisi hwn yn ei gwneud yn ofynnol i bleidleiswyr gyflwyno ID i bleidleisio mewn gorsafoedd pleidleisio mewn etholiadau cyffredinol yn y dyfodol.
Dywedodd NIA GRIFFITH, AS Llanelli:
“Mae pleidleisio’n ddiogel ym Mhrydain. Dylai Gweinidogion fod yn hybu hyder yn ein hetholiadau yn lle lledaenu straeon dychryn di-sail.
Mae miliynau o bobl heb ID ffotograffig yn y wlad hon gan gynnwys llawer yma yn Llanelli – yn enwedig yr henoed, incwm isel a phleidleiswyr Du, Asiaidd a lleiafrifoedd ethnig. Nid oes gan 7.5% o etholwyr mynediad i unrhyw ID ffotograffig o gwbl, felly byddan nhw’n cael eu heithrio rhag pleidleisio os bydd y Torïaid yn mynd ymlaen gyda hyn.
Mae trwyddedau gyrru a phasbortau yn costio arian – rhywbeth nad oes gan lawer o bobl. Yn ogystal, mae pleidleiswyr ifanc yn llawer llai tebygol o gario math o ID ffotograffig, gan fygwth tawelu eu lleisiau yn ein democratiaeth.”
Ychwanegodd yr AS, a fydd yn pleidleisio yn erbyn y cynigion yn ddiweddarach heddiw yn Nh?’r Cyffredin:
“Nid oes ots sut mae’r llywodraeth yn eu portreadu, mae’r cynlluniau hyn yn ei gwneud yn anoddach i bobl dosbarth gweithiol, pobl ifanc a lleiafrifoedd ethnig bleidleisio. Yn syml, mae’n annemocrataidd ac yn anghywir a bod y Llywodraeth yn ceisio atal pleidleiswyr.
Mae twyll pleidleiswyr yn drosedd brin iawn yn y DU. Yn 2019, allan o’r 59 miliwn o bleidleisiau mewn etholiadau, bu dim ond un euogfarn dros ddynwared pleidleiswyr – y math o dwyll y mae ID Pleidleisiwr i fynd i’r afael ag ef. Rydych chi’n fwy tebygol o gael eich taro gan fellt ddwywaith na chyflawni twyll pleidleiswyr.
Mae’r cynlluniau hyn hefyd yn syfrdanol o ddrud, a rhagwelir y bydd yn costio o leiaf £17 miliwn am bob etholiad cyffredinol – arian y gellir ei wario’n llawer gwell mewn mannau eraill.”