Mae Dame Nia Griffith AS wedi diolch i drigolion Llanelli am helpu i goffáu gwasanaeth ac aberth y rhai sy’n gwasanaethu yn ein Lluoedd Arfog, yn ogystal â chyn-filwyr, yn ystod Wythnos y Cofio.
Yn ystod Wythnos y Cofio eleni, daeth cymunedau yn Llanelli a ledled y wlad ynghyd i anrhydeddu’r rhai a ymladdodd ac a fu farw er mwyn i ni allu byw mewn rhyddid – yn y Rhyfeloedd Byd ac ym mhob gwrthdaro ers hynny.
Mae’r cyfnod hwn hefyd yn gyfle i ddiolch i gymuned y Lluoedd Arfog yn ei chyfanrwydd, gan gynnwys y dynion a’r menywod sy’n gwasanaethu heddiw, a’r teuluoedd sy’n eu cefnogi.
Canmolodd Dame Nia, Aelod Seneddol Llanelli, y gwirfoddolwyr a roddodd o’u hamser i werthu pabiau ar ran y Royal British Legion er mwyn codi arian i gymuned y Lluoedd Arfog, yn ogystal â’r rhai a fu’n helpu i drefnu digwyddiadau coffa lleol. Mynychodd wasanaethau coffa yn bersonol yn Llanelli a Five Roads.
Dywedodd:
“Mae’r cyfnod coffa hwn yn amser i anrhydeddu a chofio’r rhai a roddodd eu bywydau er mwyn i ni allu byw mewn rhyddid.
“Rwy’n talu teyrnged i bawb sydd wedi gwasanaethu, gan gynnwys y 3,600 o gyn-filwyr sy’n byw yn fy etholaeth ar hyn o bryd, ac i bawb sy’n gwasanaethu heddiw, gan wneud hynny gyda’r proffesiynoldeb mwyaf. Nhw yw’r gorau oll.
“Gwn y bydd trigolion Llanelli yn parhau i gefnogi Apêl y Pabi y ‘Royal British Legion’ ac yn cofio cyfraniad y rhai sydd wedi gwasanaethu yn ein Lluoedd Arfog, yn y gorffennol a’r presennol.”
Dywedodd yr Ysgrifennydd Amddiffyn, Wes Streeting AS:
“Cefais fy magu gyda medalau rhyfel fy nhaid a’m hen daid yn cael eu harddangos yn falch yn ein hystafell fyw. Mae amddiffyn yn rhan o’m gwaed, ac rwy’n teimlo’n gryf pa mor bwysig yw’r Cofio i’r rhai sydd wedi gwasanaethu ac i’w teuluoedd.
“Roedd y penwythnos hwn yn gyfle i oedi ac ystyried y ddyled enfawr sydd arnom i’n Lluoedd Arfog, i dalu teyrnged i’r rhai a wnaeth yr aberth eithaf wrth amddiffyn ein rhyddid, ac i ddiolch i’r rhai sy’n ein cadw’n ddiogel heno.
“Mae gennym ddyletswydd foesol i sefyll gyda’n cyn-filwyr a theuluoedd milwrol sy’n aberthu cymaint. Nhw yw’r gorau ohonom, ac mae dyled arnom i’w cefnogi, yn ogystal â mynegi ein diolch a’n hedmygedd tuag atynt.”