Nid yw’r cyhoeddiad ar gyllid rygbi rhanbarthol gan Undeb Rygbi Cymru dros y penwythnos, heb fawr o ymgynghori na manylion ynghylch beth sydd i ddilyn nesaf, wedi creu dim byd ond anhrefn ac ansicrwydd.
Wedi’i ollwng y noson cynt, ond gyda dim ond un funud o rybudd i’r rhanbarthau yr effeithiwyd arnynt cyn i Undeb Rygbi Cymru gyhoeddi eu datganiad swyddogol ddydd Sul, roedd y dull o wneud hynny yn siomedig dros ben. Mae wedi gadael i’r Scarlets a’r Gweilch, yn benodol, godi’r darnau a symud ymlaen yn y ffordd fwyaf cadarnhaol y gallant.
Mynychais ddigwyddiad rygbi ar lawr gwlad ym Mharc y Scarlets ddoe a chyfarfûm â Jon Daniels, Prif Swyddog Gweithredol y Scarlets, i addo fy nghefnogaeth wrth iddynt ymladd i sicrhau bod gan rygbi lefel uchaf gartref diogel yma yn Llanelli a Gorllewin Cymru. Mae angen i Undeb Rygbi Cymru nawr, fel mater o frys, weithio’n adeiladol gyda’r pedwar rhanbarth i gyflawni cytundeb sy’n diogelu rygbi proffesiynol yma yng Nghymru mewn ffordd sy’n gweithio i bob rhan o Gymru.
Ar ac oddi ar y cae, mae gan y Scarlets rôl enfawr i’w chwarae yn y dyfodol rygbi Cymru gyda’i hanes, ei draddodiad a’i adnodd cyfoethog o chwaraewyr, hyfforddwyr a chefnogwyr a’i safle fel porth i’r gêm yng Ngorllewin Cymru. Rydym yn haeddiannol falch yn Llanelli o’n treftadaeth rygbi ac o’r rôl y gall y Scarlets ei chwarae wrth helpu rygbi Cymru i adennill ei safle ar lwyfan Ewrop a’r Byd.
Gall a dylai ein tref a’n rhanbarth fod yn rhan bwysig o unrhyw ateb.