Mae’r Fonesig Nia Griffith, AS Llanelli, wedi galw ar benaethiaid y DVLA i ailystyried cynlluniau i ddod â’u holl lwybrau gwasanaeth bysiau gwaith i ben ar ei safle yn Abertawe o ddechrau mis Tachwedd 2023.
Mae’r gwasanaethau ar hyn o bryd yn galluogi llawer o’u staff sy’n byw yn Llanelli ac ardaloedd cyfagos i deithio yn ôl ac ymlaen i’w swyddfeydd yn Nhreforys bob dydd.
Mae’r Fonesig Nia bellach wedi ysgrifennu at Mark Harper AS, yr Ysgrifennydd Gwladol dros Drafnidiaeth, yn ei annog i ymyrryd i atal y cynigion ac yn lle hynny i ofyn i reolwyr y DVLA gynnal trafodaethau adeiladol gyda’r gweithwyr a effeithir i weld beth ellir ei wneud i wella a diogelu’r gwasanaethau.
Dywedodd y Fonesig NIA GRIFFITH AS:
“Arwyddodd cymaint o staff i weithio yn y DVLA ar y ddealltwriaeth y byddai’r cludiant hwn ar gael. Mae’n arbennig o bwysig iddynt oherwydd nad oes bysiau uniongyrchol i DVLA Abertawe.
Mae’n achubiaeth i’r rhai sydd wedi dod i ddibynnu arno ac ni allwn fforddio mentro colli staff profiadol, yn enwedig ar adeg pan fo recriwtio’n anodd iawn.
Mae lleoliad y DVLA, ar gyrion Abertawe, i ffwrdd o Ganol y Ddinas, yn gwneud y bysiau gwaith yn fwy angenrheidiol fyth. Mae’n daith hir a chymhleth, os nad yn amhosibl, ar drafnidiaeth gyhoeddus i lawer o weithwyr, yn enwedig i’r rhai sy’n byw yn Llanelli a rhannau eraill tebyg yn ne-orllewin Cymru.
Ethos gwreiddiol datganoli gwasanaethau fel y DVLA oedd dod â swyddi i ardaloedd llai ffafriol, ac mae hynny’n cynnwys yr ardaloedd ‘teithio i’r gwaith’ fel Llanelli a’r cymoedd cyfagos, nid Abertawe yn unig. Byddai’r symudiad hwn yn peryglu eu gallu i gyflawni’r egwyddor hon.”
Ychwanegodd fod y gwasanaethau bws yn dod â llawer o fanteision ychwanegol a fyddai hefyd yn cael eu colli o dan y cynlluniau.
“Mae gwasanaethau bws yn cyfrannu’n sylweddol at leihau tagfeydd ar ein ffyrdd, gan arwain at allyriadau carbon is. Nid yw ein hangen i dorri ein hôl troed carbon erioed wedi bod yn fwy, felly dylid annog gwasanaethau bysiau fel hyn nid eu dileu. Deallaf mai dim ond £2 yr wythnos y mae’r gwasanaeth presennol yn ei gostio i staff. Mae llawer o weithwyr yn cytuno bod hynny’n afrealistig o rad, a byddent yn fwy na pharod i dalu ychydig yn fwy i gadw’r gwasanaethau i fynd.
Yn lle dod â’r gwasanaeth i ben yn gyfan gwbl, rwyf wedi gofyn i’r rhai sy’n gwneud penderfyniadau yn y DVLA ailystyried y cynnig ar frys. Rwy’n fodlon gweithio gyda nhw a’r staff priodol i drafod pa opsiynau y gellid eu cynnig a fyddai’n caniatáu i’r gwasanaeth pwysig hwn barhau ar gyfer rhai sydd ei angen fwyaf.”