Gwnaeth y dechnoleg ddiweddaraf gryn argraff ar yr Aelod Seneddol lleol, y Fonesig Nia Griffith, ar ei hymweliad diweddar â ffatri cydrannau ceir Gestamp yn Felinfoel, Llanelli.
Ar ôl cyflwyniad trawiadol, yn amlygu gweithrediad byd-eang y cwmni a’r heriau sy’n wynebu’r sector ceir ledled y byd ar hyn o bryd, aeth AS Llanelli ar daith o amgylch llawr y siop gyda chyfarwyddwr y ffatri Andrew Whiles a Rheolwr Diplomyddiaeth Gorfforaethol a Materion Ewropeaidd Gestamp, Esteban Garcia de Motiloa.
Wrth sôn am yr ymweliad, dywedodd Nia Griffith,
“Gallwch weld y gwahaniaeth enfawr y mae Gestamp wedi’i wneud yn y 12 mlynedd ers iddynt feddiannu’r ffatri, gyda’r dechnoleg ddiweddaraf a gweithlu ymroddedig, yn datblygu cynnyrch y dyfodol ac yn cynnig cyfleoedd gwych i’n pobl ifanc.”
“Pan fyddwn yn meddwl am gerbydau trydan, rydym yn tueddu i ganolbwyntio’n bennaf ar y batris enfawr, ac yn aml nid ydym yn ymwybodol o gyfraniad hanfodol mewn datblygiad paneli ceir ysgafnach a weithgynhyrchir yma yn Llanelli, sy’n cyfrannu cymaint at eu diogelwch ac effeithlonrwydd. Mae hyn oll wedi’i wneud yn bosibl gan y buddsoddiad sylweddol iawn gan Gestamp yn y ffatri, gan gynnwys y llinell stampio boeth a thechnoleg torri laser. Mae gan Gestamp ffatri a gweithlu y gall Llanelli, ac yn wir y DU, fod yn wirioneddol falch ohonynt, yn cynhyrchu cydrannau ar gyfer rhai o gwmnïau ceir mwyaf adnabyddus y byd.”
“Ond mae hwn yn amser tyngedfennol ar gyfer penderfyniadau buddsoddi yn y diwydiant ceir, wrth i gwmnïau benderfynu ble i leoli eu llinellau cynhyrchu newydd. Mae Deddf Lleihau Chwyddiant yr Unol Daleithiau yn newid mawr o ran darparu cymhellion i gwmnïau fuddsoddi mewn technolegau gwyrdd ar draws Môr yr Iwerydd, ac mae symudiadau tebyg gan wledydd Ewropeaidd mawr yn peri heriau gwirioneddol i’r DU. Mae angen i Lywodraeth y DU gamu i mewn gyda phecynnau tebyg i wneud y DU yn gyrchfan i gwmnïau fel Gestamp fuddsoddi yn y technolegau gwyrdd newydd a chadw sector gweithgynhyrchu ceir hyfyw.”
“A hynny cyn i ni hyd yn oed ddod at brisiau ynni, sy’n llawer uwch yn y DU nag mewn mannau eraill, ac sy’n cael effaith sylweddol ar allu ein diwydiant gweithgynhyrchu i gystadlu. Mae’n hen bryd ar gyfer ymgyrch at ynni adnewyddadwy a diwygio’r farchnad ynni.”
